စာရေးသူတို့ လူသားတွေဆိုတာ ချစ်ခြင်းမေတ္တာ၊ ဂရုဏာနဲ့ အသိအမှတ်ပြုမှုတွေကို လိုအပ်ကြတဲ့သူတွေပါ။ ဒါတွေက လူမှုဘဝကို အဓိပ္ပာယ်ရှိရှိ ဖန်တီးပေးတဲ့ အခြေခံလိုအပ်ချက်တွေပဲ ဖြစ်တယ်။ ဒါပေမဲ့ လူတွေ မှီခိုအားထားနေရတဲ့ အုပ်ချုပ်ရေးယန္တရားဖြစ်တဲ့ ဗြူရိုကရေစီစနစ် (Bureaucracy) ကိုတော့ ဒီလိုအရာတွေ သွားတောင်းဆိုလို့ မရဘူး။ ဒီယန္တရားကြီးက လူတွေအပေါ် မေတ္တာမထားနိုင်ဘူး။ သူက ပုံစံတွေ၊ စည်းမျဉ်းစည်းကမ်းတွေ၊ လုပ်ထုံးလုပ်နည်းတွေနဲ့ သတ်မှတ်ထားတဲ့ ကဏ္ဍတွေအတိုင်းပဲ အလုပ်လုပ်တာကို တွေ့ရတယ်။
ဗြူရိုကရေစီစနစ်ရဲ့ သဘာဝကိုက စိတ်ခံစားမှု ကင်းမဲ့တယ်။ သူ့ရဲ့ အဓိကရည်ရွယ်ချက်က ညီညွတ်မှု (Uniformity)၊ ထိရောက်မှု (Efficiency) နဲ့ ကြားနေမှု (Neutrality) ရှိစေဖို့ပဲ ဖြစ်တယ်။ လူတဦးချင်းရဲ့ ထူးခြားတဲ့ ဒုက္ခဝေဒနာ၊ စိတ်ခံစားမှု အတက်အကျ၊ ဒါမှမဟုတ် တကိုယ်ရေ ဂုဏ်သိက္ခာကို ဗြူရိုကရေစီစနစ်က စိစစ်ခွဲခြားမပေးနိုင်ဘူး။ သူတို့ မြင်တာက သင့်နာမည်မဟုတ်ဘဲ သင့်ရဲ့ မှတ်ပုံတင်နံပါတ်၊ သင့်ရဲ့ ပိုင်ဆိုင်မှုအဆင့်၊ သတ်မှတ်ထားတဲ့ အခြေအနေ (Category) တခုသာ ဖြစ်တယ်။ စည်းမျဉ်းတခုက လူတဦးအတွက် ဘယ်လောက်တရားမျှတမှု မရှိဘူး၊ ဘယ်လောက်အန္တရာယ်ရှိတယ်ဆိုတာ သိပေမဲ့လည်း စနစ်က ဆက်ပြီး လည်ပတ်နေရတယ်။ အကြောင်းကတော့ စနစ်အတွက် စည်းမျဉ်းကို လိုက်နာဖို့က ပုဂ္ဂိုလ်ရေးဆိုင်ရာ နာကျင်မှုကို နားလည်ပေးဖို့ထက် ပိုအရေးကြီးလို့ပဲ။
ဒီလို စိတ်ကူးယဉ်ဆန်တဲ့ "ကြားနေမှု" ဒါမှမဟုတ် "ဘက်မလိုက်မှု" ဟာ တခါတလေကျရင် ကြမ်းတမ်းတဲ့အရာ ဖြစ်လာတတ်တယ်။ ဘာကြောင့်လဲဆိုတော့ လူသားတွေကို အုပ်ချုပ်ရေးအချက်အလက် (Administrative Data) အဖြစ် ပြောင်းလဲလိုက်တဲ့အခါ လူသားဆန်တဲ့ ဆက်ဆံရေး ပျောက်ဆုံးသွားလို့ပဲ။ နိုင်ငံတော်ရဲ့ ကြီးမားတဲ့ ယန္တရားကြီးထဲမှာ စာရေးသူတို့ဟာ ကိန်းဂဏန်းတွေ ဒါမှမဟုတ် ဖြည့်စွက်ရမယ့် ပုံစံတွေ ဖြစ်လာတယ်။ အစိုးရဌာန တခုခုမှာ သွားရောက်ပြီး စာရေးသူတို့ လိုအပ်နေတဲ့ ဂရုဏာ ဒါမှမဟုတ် နားလည်မှုကို တောင်းဆိုတဲ့အခါ၊ အဲဒီဌာနက တာဝန်ရှိသူက "စည်းမျဉ်းက ဒီလိုပါပဲ" လို့ ဖြေတာကိုပဲ ကြားရတတ်တယ်။ အဲဒီအချိန်မှာ ဗြူရိုကရေစီက သူ့ရဲ့ အချစ်မဲ့ခြင်းကို ထင်ရှားစွာ ပြသလိုက်တာပဲ။ စိတ်ဝိညာဉ်မရှိတဲ့ စနစ်တခုက စိတ်ဝိညာဉ်ရှိတဲ့ လူသားတွေကို ဘယ်တော့မှ နားလည်နိုင်စွမ်း မရှိဘူး။ နိုင်ငံတော်ရဲ့ ဖွဲ့စည်းပုံအခြေခံကိစ္စတွေမှာ လူသားဆန်မှု မပျောက်ဆုံးအောင် ဗြူရိုကရေစီကို စာရေးသူတို့ ထိန်းချုပ်ပြီး လူသားလိုအပ်ချက်တွေကို ဦးစားပေးနိုင်တဲ့ စနစ်တွေကို ဖန်တီးဖို့ လိုအပ်တယ်လို့ ဆိုရလိမ့်မယ်။
Comments
Post a Comment